吴崇铭 King Wu

吳崇銘喺2008年「私人国」（Kingdom C）搞嘅音樂比賽《星投大戰》贏得冠軍，獲得唱片合約而正式入行。

後來公司決定將比賽嘅最後四強（吳崇銘、陳健安、梁釗峰、何建曦）組成一隊男子組合出道，即 C AllStar。King 喺組合入面做主唱、高音和唱或者Beatbox。主唱歌曲包括《大雨傾城》（未被收錄喺任何專輯）、《直到你肯定》、《逾越生死》、《混沌》。 其中《大雨傾城》係佢贏「星投大戰Season 1」冠軍之後，由「私人国」為佢推出嘅一首單曲 MV。

後來佢開始創作電子舞曲（EDM）音樂，《混沌》係佢第一首同時擔任作曲同編曲嘅電子音樂作品，而《請勿靠近車門》係佢第一首為專輯《生於斯》創作嘅電子音樂間奏作品。

喺2016年，佢接受澳門導演陳雅莉邀請，拍澳門電影《那一年，我17》，喺電影做第二男主角，佢喺電影入面演嘅角色喜劇形象突出，演技受到好評。而同年12月24日平安夜佢喺尖沙咀海旁唱歌打碟，成為首位喺香港以打碟形式報佳音嘅華人DJ。

2017年，佢獲大陸一個大型電子音樂節邀請，以 DJ King 身份演出，更加俾大會稱為「亞洲十大華人DJ 及 亞洲電音王子」。

喺2017年10月紅館《生於C AllStar 演唱會》中負責為所有舞蹈表演音樂編曲，更以DJ King身份表演打碟，圓咗喺紅館舞台打碟嘅夢想。

喺2018年佢以DJ King身份喺叱咤903同Donald 主持一個介紹電子音樂嘅電台節目《聽????啲Music》。同年四月佢喺《Road to ULTRA Hong Kong 2018》嘅記者會上擔任司儀嗰陣宣布佢獲得主辦單位邀請以"香港EDM界新星"嘅名義成為今年音樂節表演者之一。